 |
Heim
Saga
C.L.M. framætt
J.S.R. framætt
Niðjatal
Myndir
Myndir-2
Myndir-3
Myndir-4
Ljóðmæli
Sagnaþættir
Minningar
Lausir endar
Krækjur
English Summary
Póstur
|
|
Til baka á minningarsíðu.
 |
Alfreð Möller
f: 30. desember 109
d: 10. janúar 1994 |
 |
(Mbl 18. janúar 1994)
Dags er geislar dofna
dauðinn hraðar för
sælt er að mega sofna
með sigurbros á vör.
Minning manninn lifir
að mold þó hverfi hann
auga þínu yfir
aldur lífsins brann.
(GK)
Þessar ljóðlínur komu
mér í hug við fráfall tengdaföður míns hins mæta manns, Alfreðs Möller.
Alfreð Möller var fæddur í Miðhúsum í Óslandshlíð í Skagafirði, sonur Jónu
Sigurbjargar Rögnvaldsdóttur og Christians Ludvigs Möllers, verslunarmanns
og lögregluþjóns á Siglufirði. Hann var elstur átta barna þeirra
hjóna.
Alfreð kvæntist 16. október 1937 Friðnýju S. Baldvinsdóttur frá
Stóra-Eyrarlandi við Akureyri. Þeim varð sex barna auðið. Þau eru Lucinda Gigja, gift undirrituðum, Halldóri Hallgrímssyni; Páll Geir,
kvæntur Gerði Guðvarðardóttur; Súsanna Jóna, var gift Einari Guðnasyni;
Alma Kristín, gift Birgi Birni Svavarssyni; Erla Elva, sambýlismaður
hennar er Sverrir Sigurvinsson; og Jóhann Gunnar, kvæntur Stefaníu
Hauksdóttur. Afabörnin eru 15 og langafabörnin 23.
Fyrstu kynni okkar
Alfreðs urðu þegar dóttir hans, núverandi eiginkona mín. Gigja, kynnti mig
sem unnusta sinn, en þá sagði Alfreð: „Ég hef aldrei ráðið neitt við
stelpuna og ég býst við að þú gerir það ekki heldur.“ Þannig kom
hann fram, fullur af hreinskilni alla tíð, hreinskilni sem var blönduð
skemmtilegri kímni. Þegar litið er yfir farinn veg er margs að
minnast, svo sem ánægjustunda á heimili þeirra hjóna Friðnýjar og Alfreðs.
Þegar fjölskyldan kom saman tók Friðný fram „mandólínið“, börnin sín
hljóðfæri og lagið var tekið. Hjá þeim hjónum var gestrisni og
hjartahlýja í fyrirrúmi , sem yljaði okkur sem þar bar að garði.
Alfreð var bóngóður maður er vildi leysa hvers manns vanda er til hans
leitaði, en vildi sem minnst um það tala.
Alfreð var félagslyndur maður og nutu mörg félög krafta hans. Hann
var völundur til handa, sem margir gripir bera vitni um, svo sem
Atla-stöngin og Alfreðs-stöngin, sem hann gerði og gaf sem verðlaunagripi
fyrir sjómannadaginn. Friðný lést 22. apríl 1988 og var það
mikið áfall fyrir Alfreð og fjölskylduna. Má segja, að hann hafi
ekki verið samur maður eftir. Börnin og fjölskyldur þeirra reyndu að
létta honum missinn eins og hægt var, en ljósið í lífi hans var slokknað.
Ég vil fyrir hönd tengdabarna Alfreðs og Friðnýjar, þakka fyrir
samfylgdina og allt sem þau gáfu okkur.
Yndi er að eiga
ást og fórnarblóð
þín margir sakna mega
er meta verkin góð.
Þér ég þakkir færi
þín var kynning hlý.
Vík nú vinur kæri,
verksvið inn á ný.
(GK)
Halldór Hallgrímsson
Við viljum með nokkrum
orðum minnast afa okkar, Alfreðs Möller, sem lést 10. janúar síðastliðinn,
84 ára að aldri.
Allt frá því að amma okkar Friðný S. Baldvinsdóttir, lést í apríl 1988,
hefur afi viljað komast til hennar og nú hefur hann fengið ósk sína
uppfyllta. Afi átti erfitt með að tjá tilfinningar sínar
en við vissum og fundum þá að missir afa var mikill, því upp frá því var
eins og lífsljós hans tæki að dofna. Nú eru þau afi og amma, loks
saman á ný. Afi hefur í gegnum árin fylgst vel með okkur
afabörnunum. Hann var ef til vill ekki mikill barnakarl, en hafði þó
áhuga á flestu því sem við krakkarnir tókum okkur fyrir hendur. Hann
fylgdist með okkur í leik og starfi og nú seinustu árin hafði hann
sérstaka ánægju af því að fylgjast með yngstu börnunum og langafabörnunum.
Afi vildi gjarnan hafa fjölskylduna í kringum sig. Við sem
eldri erum munum eftir fjölskylduútilegum þar sem hljóðfærin voru dregin
fram og mikið sungið, en söngurinn var einmitt eitt af áhugamálum afa
okkar. Öll munum við skemmtilegar stundir á heimili afa og ömmu en
þangað var alltaf gott að koma.
Afi fylgdist alla tíð vel með öllum tækninýjungum og var fljótur að
tileinka sér þær. Hann var t.d.kominn á níræðisaldurinn þegar hann
festi kaup á gervihnattardiski og stytti það honum stundir síðustu árin.
Nú er elsku afi horfinn okkur um stund en minningarnar ljúfar lofa góðan
endurfund.
Við þökkum þér alla
ástúð
á umliðnu tímans safni.
Við kveðjum með klökkum huga
við kveðjum í drottins nafni.
(HH)
Afabörn.
|
|
|
|
