Heim
 Saga
 C.L.M. framætt
 J.S.R. framætt

  Niðjatal
 Myndir
  Myndir-2
 Myndir-3
 Myndir-4

  Ljóðmæli
  Sagnaþættir
 Minningar
  Lausir endar
 Krækjur

English Summary

Póstur

Til baka á minningarsíðu.

Friðný Sigurjóna Möller f: 16. október 1918 d: 22. apríl 1988

(Dagur. 2.maí 1988)

Síðastliðinn föstudag var kvödd hinstu kveðju nágrannakona okkar og vinkona, Friðný S. Möller.  Friðný var fædd á Akureyri 16.10.1918.  Foreldrar hennar voru hjónin Baldvin Benediktsson frá Steðja í Hörgárdal og Kristín Guðmundsdóttir frá Hvammi í Hrafnagilshreppi.  Friðný gekk árið 1937 í hjónaband með Alfreð Möller frá Siglufirði og undanfarinn áratug hefur heimili þeirra verið í Furulundi 11a.  Ekki verður hér fjölyrt um ævihlaup Friðnýjar Möller, enda aðrir til þess hæfari.  Hins vegar er bæði ljúft og skylt að minnast í nokkrum orðum og þakka þau ánægjulegu kynni og þann félagsskap sem af henni var.  Nokkrum sinnum á ári hittumst við nágrannarnir í Furulundi 11 og áttum kvöldstund saman.  Okkur til ánægju og yndisauka.  Allir lögðu sitt að mörkum til að þessar stundir yrðu í senn ánægjulegar og eftirminnilegar.  Enda þótt slík samskipti nágranna séu sjálfsagt ekki einsdæmi, þá veittu þessar stundir ungum og öldnum ómælda ánægju og gáfu sambýlinu aukið gildi.

Enda þótt Þau Friðný og Alfreð væru allnokkru eldri að árum en við hin, þá voru þau bæði fullgildir þátttakendur í öllu okkar stússi, hvort sem um var að ræða framkvæmdir við húsið, álega sumarskemmtun, Þorrablót, jólaglögg eða hvað það gat heitið.  Síðast hittumst við öll um páskana og þá var Friðný að venju hrókur alls fagnaðar á sinn látlausa hátt, hló og gerði að gamni sínu og undi hag sínum hið besta.  Síst grunaði okkur þá að aðeins tæpum þrem vikum síðar yrði hún öll.

Við nágrannar Friðnýjar og Alfreðs Möller viljum ekki láta hjá líða að þakka Friðnýju Möller samfylgdina, hvort sem hún hefur verið lengri eða  skemmri.  Með henni er genginn góður granni sem aldrei skildi annað eftir sig en það sem gott var og jákvætt. Alfreð Möller og hans fjölskyldu vottum við dýpstu samúð og biðjum honum blessunar og styrks um ókomin ár

Íbúar Furulundi 11

Kveðja til ömmu.
  Við kveðjum þig elsku amma. Amma, þú sem alltaf varst svo kát og hress.  Þú sem varst hrókur alls fagnaðar, hvar sem þú komst.  Amma sem varst svo ung í anda þó að aldurinn færðist yfir.  Við minnumst, þegar þú tókst fram manólínið þitt og spilaðir og söngst fyrir okkur krakkana.  Við minnumst allra ferðalaganna sem við fórum saman.  Við minnumst þín sem  vinkonu sem alltaf var hægt að leita til.  Við minnumst allra góðu stundanna sem við áttum saman.  Þú áttir þínar erfiðu stundir, en yfirvannst þær með styrk þínum og góðri lund.  Nú ertu horfin okkur um stund, en minningarnar ljúfar lofa góðan endurfund.

Þú brostir við brosi sólar
- það bros kom frá göfugu hjarta
- svo sagði þú: „en sá ylur
ég elska sólskynið bjarta“

Þú elskaðir allt hið góða
og það allt sem blessun veitir
og hjartanna harma stillir
og hatri í kærleik breytir.

Við þökkum þér alla ástúð
á umliðnum tímans safni
Við kveðjum með klökkum huga
og kveðjum í drottins nafni.
(HH)

Barnabörn.